28 de junio de 2017

Mulleres bravas da nosa historia: Maruja Mallo

A través deste volume mergullámonos na vida dunha das nosas artistas máis rompedoras.
Coñecemos aquela nena que amarrou con forza o soño de se converter nunha extraordinaria pintora.
Ela era unha muller apaixonante e apaixonada.
Unha muller intelixente, estudada que prendeu nas cores vivas, nas formas xeométricas, no cosmos e todo aquilo que podía representar nos seus lenzos.
Unha muller que fixo unha personaxe de si mesma e que non deixaba indiferente a quen se cruzaba no seu camiño.
Unha muller libre e comprometida.
Unha muller leal ás amizadas e, sobre todo, unha muller brava.
Ela era… Maruja Mallo.


O terceiro caderno da serie Mulleres bravas da nosa historia, que Urco Editora dedica a reivindicar e visibilizar as mulleres exemplares da historia da Galiza, está adicado á pintora surrealista Maruja Mallo. Nesta ocasión, as ilustracións voltan ser obra de Eva Agra, deseñadora titular da colección, e o texto é obra da pontevedresa Elvira Ribeiro. A capa homenaxea obras senlleiras da pintora, coa cor marela dourada e as espigas de trigo de O canto das espigas, e as formas xeométricas en tons azuis de cadros como Airagu ou Panteo.

Neste volume non existe a figura da narradora (o lucecú de Rosalía ou a Navia de María Victoria Moreno), pero o seu prantexamento é moi similar ao dos dous anteriores: mantense o formato de álbum ilustrado a páxina completa, co texto distribuido en recadros con distintas cores de fondo e tipografías. Os recadros mourados conteñen o texto principal en letra serif, e os recadros verdes, máis pequenos e con letra de pau, os textos de apoio con información adicional. O caderno inclúe tamén dúas páxinas cunha completa cronoloxía da pintora e catro actividades, tres baseadas en cadros de Maruja Mallo e unha para descubrir a outras pintoras galegas, ben coetáneas dela, ben contemporáneas nosas. Deste xeito, o volume, como o resto da colección, resulta axeitado para o seu emprego como material educativo no eido escolar. 

A famosa imaxe da pintora cuberta de algas reprodúcese
no caderno, redebuxada pola man de Eva Agra

Este terceiro volume de Mulleres bravas da nosa historia ten dous valores fundamentais: o primeiro, ofrecer información biográfica dabondo sobre Maruja Mallo en paralelo á súa importancia no vangarda artística do surrealismo ao longo do século XX, incluido o esquecemento da súa figura e o seu rexurdir como musa de movementos contraculturais como o punk ou a movida madrileña. E o segundo, sendóo por ser ela de seu, afeitos como estamos a coñecela no papel de «amiga de Miguel Hernández», «parella intermitente de Rafael Alberti», «protexida de Luis Buñuel» ou «favorita de André Breton». Abofé que se salienta a súa etapa madrileña, e a súa amizade con todos eles: Federico García Lorca, Margarita Manso, María Zambrano, Salvador Dalí... que non é outra cousa que a súa pertenza, en resumo, á Xeración do 27, como un membro daquel fervedoiro de ideas e daquel ambiente de liberdade creativa no que deixaría de ser Ana María Gómez González e adoptaría o seudónimo pola que se lle coñeceu dende entón. 

A autora, Elvira Ribeiro, acadou condesar gran cantidade de datos en pouco espazo, e facelos atractivos e doados de interpretar para as crianzas. Cómpre lembrar que a colección conta cun comité asesor, formado por Patricia Porto, libreira e educadora social, e Mariám Mariño, membro Consello da Cultura Galega, e que nesta ocasión sumou a Clara Rodríguez Cordeiro, historiadora e comisaria de arte. 

Reprodúcense tres cadros da pintora: O canto das espigas (1929), Cabeza de muller (1946), e Airagu (1979). Eva Agra fai tamén unha interpretación persoal de A sorpresa do trigo (1936). 


Así, con este terceiro volume, a serie Mulleres bravas da nosa historia exténdese da literatura á pintura, e escolle a unha galega universal, cuxa figura cómpre poñer en valor, pois por ter vivido a meirande parte da súa vida fóra da Galiza, e pola escasa atención que recibe polo xeral o arte moderno, atópase no esquecemento para un amplo sector do gran público. 


ONDE ATOPALO: 

Mulleres bravas da nosa historia - 3- Maruja Mallo pode mercarse por 10 euros na páxina web de Urco Editora, sen gastos de envío engadidos, na páxina web do Consorcio Editorial Galego, ou nas librarías do país. 


LIGAZÓNS DE INTERESE:

Ficha do libro e da colección na páxina da editora. 

Elvira Ribeiro: Ficha en Urco Editora, Facebook.


FICHA TÉCNICA:

Autora: ELVIRA RIBEIRO
Colección: MULLERES BRAVAS DA NOSA HISTORIA
Formato: 210x210mm
Encadernación: rústica con capas plastificadas
ISBN: 978-84-16121-82-3
Páxinas: 36
PVP: 10€


Compártelo:

0 comentarios:

Publicar un comentario

Y tú, ¿Qué opinas?

SUSCRIBIRSE POR CORREO

Recibe las actualizaciones en tu e-mail

Archivo

Seguir en las redes